Prins Michiel I met adjes Calvin, Loek & Timo

Ich, Prins Michiel I,

26 jaor jóngk, eine echte Wèssemer en woeanachtig op Achter de Graef mèt Ruth. Ich bön gruuets det ich in 2025 prins van ’t Golfbraekersriek moog zeen. Mèt de vastelaovendj laot ich al mien werkzaamheje bie Van Aarsen ligke, óndanks det ich ’t mèt alle plezeer doon.

Vastelaovendj viere zitj in mien gene. Zoea bön ich de

5e Maessen-Prins inne femilie.

Daonaeve zit ich in ’t bestuur bie de Bacchusklup. In 2019 höb ich in Wèssem al regelmaotig op ’t podium moge staon es Bacchus. Det waas ein mega ervaring, woeadoor ich noe mèt extra väöl enthousiasme ’t vastelaovesseizoen in gaon.

Ich kan neet wachte óm same mèt mien adjes, de Braekerkes, Dansgarde, Golfbraekers, Damesgarde, ’t Boerebroedspaar, de Bacchus en alle inwoeaners van Wèssem d’r ein ónvergaetelijk seizoen van te make!

Det allemaol ónger miene liefspreuk:

Drank teväöl, slaop tekórt, vastelaovendj mèt ós is topsport.

Proclamatie

Ich, prins Michiel de ieërste, hieërser uuever ’t Golfbraekersriek, ’n geboeare en getoeage Wèssemer, zoon van Jac Maessen en juffrouw Tinie, metaalbewèrker bie Van Aarsen, bestuurslid van De Bacchusklup.

Doon te weite:

Ten 1^e

Det ich neet lang nao hoofdje te dinke bie de vraog of ich prins wooj waere van De Golfbraekers, det waas eine volmondige ‘jao’.

Ten 2^e

Det ich, Prins Michiel I, ‘t geweldig vinj óm same mèt mien drie adjudante Timo, Calvin en Loek d’r ein fantastisch vastelaovesseizoen van te gaon make.

Ten 3^e

Det ze ‘t bie Van Aarsen de kómmendje tied regelmaotig sónger mich mótte doon.

Ten 4^e

Det ich d’r gruuets op bön de 5^e Maossen-prins inne femilie te moge zeen.

Ten 5^e  

Det ich recent bön gaon samewoeane en dit dus beteikentj det De Bongerd weer eine prins inne buurt haet.

Ten 6^e

Det ich de ieërste prins bön dae Bacchus is gewaestj.

Ten 7^e

Det café Maosse dit jaor weer eine echte prins haet en neet weer emes mèt eine steek oppe kop en eine pleebeustel inne henj.

Ten 8^e

Det ich alvast sorry wil zègke tieëge Ruth vuuer de slaopeloze nachte die nog kómme gaon, want wae höbbe geine eindtied. ein van mien adjes zal dich waal appe woea ich weer oethang.

Ten 9^e

Det ich de ieërste prins moog zeen inne noewe zaal, en laote we hoeape mèt stroum.

Ten 10^e

Det mien Bacchus-jeske dit jaor väöl inne kast zal blieve hange, mer d’r zeker neet minder mèt uch gefieëstj waerdtj.

Ten 11^e

Det wae d’r same mèt alle Wèssemse vereninge en vastelaovesvierders ‘n geweldig seizoen van gaon make.

Ónger miene liefspreuk:

Drank teväöl, slaop tekórt, vastelaovendj mèt ós is topsport.